Helgi Hálfdanarson - Tilvitnanir

Breyskleikasyndir koma þráfallt fyrir hjá guðhræddum mönnum, en ásetningssyndir hjá óguðlegum.

Mér hefur virzt sú skoðun nokkuð almenn, að sú deild háskólans, sem kennd er við íslenzk fræði, sé helst til lík þeirri læknastétt, sem fengist við það eitt að safna gögnum um heilsufar landsmanna fyrr og síðar, greina sjúkdóma og skrá tíðni dauðsfalla af völdum þeirra á ýmsum tímum, ekki í því skyni að ráða niðurlögum neinnar veiki, heldur af hreinvísindalegum áhuga einum saman; enda væri sjúkdómur, sem maður hefur á annað borð tekið, orðinn hið rétta eðli þess manns upp frá því; fylgzt væri vandlega með stöku sjúklingi, ekki til að reyna að lækna hann, heldur til að skrá líðan hans dag frá degi á skýrslur og líta á klukkuna þegar hann deyr.

Svo eru listamanna-verðlaun sögð veitt í heiðurs skyni. En þar er því miður sá hængur á, að heiður geta menn einungis veitt sér sjálfir; og í þokkabót er það einkamál hvers og eins, í hverju hann er fólginn. Þessi verðlauna-árátta er ekki annað en erlendur ósiður, litlu skárri en orðufarganið, sú hlálega eftirlegukind miðalda.

... ég ber hyldjúpa virðingu fyrir stærðfræði, enda þekki ég allt of lítið til hennar til þess að geta fyrirlitið hana. Hins vegar hef ég andmælt við Þorstein [Gylfason] þeirri firru, að stærðfræði sé kölluð listgrein, þó að hún sé stórmerkileg á sína vísu. Mig minnir að ég hafi einhvern tíma á góðri stund haldið að Þorsteini þeirri kenningu að stærðfræði og list væru pólar mannlegrar snilli, því stærðfræði væri aðferð til að hugsa út fyrir skilning sinn, en list væri aðferð til að skilja út fyrir hugsun sína.

Aldrei mun ég hylla neinn þann forseta, sem smjaðrar fyrir lágkúrunni með því að segja „við Íslendingar“, þegar hann reynir að halda hátíðarræðu.

Menn mega ekki af tómum ótta við sinn eigin þjóðrembing vanmeta þjóðleg menningarverðmæti, hvað þá vanrækja þau.

Stærðfræði og list eru pólar mannlegrar snilli, því stærðfræði er aðferð til að hugsa út fyrir skilning sinn, en list er aðferð til að skilja út fyrir hugsun sína.