Ljósið loftin fyllir
og loftin verða blá.
Vorið tánum tyllir
tindana á.

Dagarnir lengjast
og dimman flýr í sjó.
Bráðum syngur lóa
í brekku og mó.

Og lambagrasið ljósa
litkar mel og barð
og sóleyjar spretta
sunnan við garð.

Þá flettir sól af fjöllunum
fannanna strút.
Í kaupstað verður farið
og kýrnar leystar út.

Bráðum glóey gyllir
geimana blá.
Vorið tánum tyllir
tindana á.